ورځنۍ رڼا, اکتوبر ۱۳: پاک شئ ځکه چې زۀ پاک يم (اول پطروس ۱:۱۶)

د وړومبۍ ورځې نه کله چې تا خپل سوچ دې ته تيار کړو چې پوهه حاصله کړې او د خُدائ پاک په وړاندې دې خپل ځان عاجز کړو، نو ستا دُعا قبوله شوه.

دانيال ۱۰:۱۲

زۀ هغه مقدس خُدائ تعالىٰ يم، چې د همېشه دپاره ژوندے يم. زۀ په اوچت او مقدس مقام کښې اوسېږم، خو زۀ د هغه خلقو سره هم اوسېږم چې څوک د روح عاجزان او توبه ګار وى، نو چې داسې زۀ د هغوئ خوشحالى او حوصله بحال کړم.

يشعياه ۵۷:۱۵

پاکه خُدايه تا ته د عاجز او مات روحونو خوښه ده قربانى، تۀ غمژن او توبه ګار زړۀ سپک نۀ ګڼې.

زبور ۵۱:۱۷

کۀ څۀ هم چې مالِک خُدائ ډېر اوچت دے، خو بيا هم د ښکته خلقو خيال ساتى، خو هغه کبرژن د ډېر لرې نه پېژنى.

زبور ۱۳۸:۶

نو په دې وجه د خُدائ پاک د مضبوط لاس لاندې په عاجزۍ اوسېږئ نو چې هغه تاسو له په وخت عزت درکړى.

اول پطروس ۵:۶

خُدائ پاک د کبرژنو مقابله کوى خو عاجزانو له فضل ورکوى. نو په دې وجه خپل ځانونه بيا د خُدائ پاک تابع کړئ.

يعقوب ۴:۶–۷

تۀ بخښونکے او ښۀ يې مالِکه خُدايه، او څوک چې درنه سوال کوى تۀ د هغوئ سره نۀ ختمېدونکې مينه کوې. زما دُعا واوره، اے مالِکه خُدايه، د رحم دپاره زما ژړا واوره. زما د تکليف په ورځ به زۀ تا ته آواز وکړم، نو تۀ به جواب راکړې.

زبور ۸۶:۵–۷

ستا مرضى دې په زمکه هم پوره شى څنګه چې په آسمان کښې پوره کيږى.

متى ۶:۱۰

نو ځکه کم عقل کېږئ مۀ بلکې په دې ځان پوهه کړئ چې د مالِک مرضى څۀ ده.

اِفِسيانو ۵:۱۷

هم دغه شان ستاسو د آسمانى پلار دا رضا نۀ ده چې د دې ماشومانو نه دې يو هم هلاک شى.

متى ۱۸:۱۴

ځکه چې د خُدائ پاک مرضى دا ده چې تاسو پاک شئ.

اول تِسالونيکيان ۴:۳

نو چې تاسو خپل نور پاتې دُنياوى ژوند په انسانى خواهشونو تېر نۀ کړئ بلکې د خُدائ پاک د مرضۍ په مطابق يې تېر کړئ.

اول پطروس ۴:۲

هغۀ د خپل مقصد پوره کولو دپاره مونږ د حق کلام په وسيله پېدا کړُو نو چې مونږ د هغۀ په مخلوقاتو کښې وړومبۍ مېوه شُو. نو ځکه تاسو ټول د ځان نه د پليتوالے او د بدۍ ګند لرې کړئ.

يعقوب ۱:۱۸, ۲۱

پاک شئ ځکه چې زۀ پاک يم.

اول پطروس ۱:۱۶

او هغه ګېرچاپېره ناستو خلقو ته يې وکتل او وې فرمائيل چې، ”زما مور او وروڼه دا دى. څوک چې د خُدائ پاک رضا کوى، هغه زما ورور خور او مور ده.“

مرقوس ۳:۳۴–۳۵

هر هغه څوک چې زما دا خبرې اورى او عمل پرې کوى، هغه به د هغه هوښيار کس په شان وګڼلے شى چا چې خپل کور د يو سخت ګټ دپاسه آباد کړے وى. او چې باران وشو، سېلاب راغلو، زل زول او طوفان تير شو او د دۀ کور سره يې ډغرې وخوړې، خو دا راپرې نۀ وتو ځکه چې بنيادونه يې د يو سخت ګټ دپاسه وُو.

متى ۷:۲۴–۲۵

دُنيا او د هغې شوق تېرېدونکى دى، خو څوک چې د خُدائ پاک په مرضۍ عمل کوى هغه به تل تر تله ژوندے وى.

اول يوحنا ۲:۱۷