ورځنۍ رڼا, اپریل ۲۴: او د ټولو سترګې تا ته دى (زبور ۱۴۵:۱۵)

مالِک خُدائ ساره له برکت ورکړو او خپله وعده يې ورسره پوره کړه.

پېدايښت ۲۱:۱

اے خلقو هر وخت هغۀ باندې يقين ساتئ. تاسو هغۀ ته د خپل زړۀ مشکل بيانوئ، ځکه چې خُدائ پاک زمونږ پناه ګاه دے.

زبور ۶۲:۸

خو مالِک خُدائ د داؤد خُدائ پاک د هغۀ ايمان مضبوط کړو.

اول سموئيل ۳۰:۶

خو خُدائ پاک به په رښتيا سره ستاسو خيال وساتى او د دې مُلک نه به مو هغه مُلک ته بوځى د کوم چې هغۀ د اِبراهيم، اِسحاق او د يعقوب سره پخه وعده کړې وه.

پېدايښت ۵۰:۲۴

ما وليدل چې زما د خلقو سره په مِصر کښې څومره ظلم کيږى، ما د هغوئ فرياد اورېدلے دے او زۀ راغلم چې هغوئ له خلاصون ورکړم. ... هغۀ هغوئ د مِصر نه وويستل او بيا يې په مِصر او بحرِقُلزم او په صحرا کښې تر څلوېښتو کالو پورې ډېر عجيبه کارونه او معجزې وښودلې.

اعمال ۷:۳۴, ۳۶

مالِک خُدائ چې د بنى اِسرائيلو سره څومره وعدې کړې وې نو په هغې کښې يوه هم نۀ وه ناکامه شوې او ټولې يې پوره کړې وې.

يشوَع ۲۱:۴۵

راځئ چې مونږ د خپل اُميد په اقرار کولو بغېر د يرېدو نه کلک ودرېږو ځکه چا چې لوظ کړے دے هغه وفادار دے.

عبرانيان ۱۰:۲۳

هغه چې کومه وعده وکړى، نو هغه پوره کوى، هغه چې څۀ وائى، نو هغه کوى.

شمېر ۲۳:۱۹

زمکه او آسمان به فنا شى خو زما کلام به هيچرې فنا نۀ شى.

متى ۲۴:۳۵

نو، واښۀ اوچ شى او ګلونه مړاوى شى، خو د مالِک خُدائ کلام د همېشه دپاره قائم وى.

يشعياه ۴۰:۸

او د ټولو سترګې تا ته دى.

زبور ۱۴۵:۱۵

بلکې هغه په خپله ټولو بنى آدمو له ژوند، ساه او هر څۀ ورکوى.

اعمال ۱۷:۲۵

مالِک خُدائ د هر چا سره ښۀ دے، او هر څۀ چې هغۀ پېدا کړى دى په هغه ټولو مهربانه دے.

زبور ۱۴۵:۹

د هوا مارغانو ته وګورئ، دوئ نۀ خو کَرى او نۀ رېبى او نۀ يې خمبو کښې جمع کوى خو بيا هم ستاسو آسمانى پلار هغوئ له رزق ورکوى.

متى ۶:۲۶

نو ځکه په يهودى او په غېر يهودى کښې هيڅ فرق نشته چې هم دغه يو خُدائ پاک د ټولو مالِک دے او د هغوئ ټولو دپاره چې هغۀ ته زارى کوى، غنى دے.

روميان ۱۰:۱۲

ما خپلې سترګې غرونو ته نيولې دى. چې زما مدد به د کوم ځايه راځى؟

زبور ۱۲۱:۱

لکه څنګه چې غلام د خپل مالِک لاس ته ګورى، او لکه څنګه چې وينځه د خپلې بى‌بى لاس ته ګورى، نو دغه شان زمونږ سترګې د مالِک خُدائ زمونږ خُدائ پاک ته ګورى.

زبور ۱۲۳:۲

بختور دى هغوئ چې د هغۀ د مدد په انتظار کښې وى.

يشعياه ۳۰:۱۸

په هغه وخت به هغوئ وائى، ”وګورئ دا دے زمونږ خُدائ پاک. مونږ د هغۀ په انتظار وُو او هغۀ مونږ آزاد کړُو. دا دے هغه مالِک خُدائ د چا چې مونږ په انتظار وُو. راځئ چې د هغۀ په خلاصون باندې د خوشحالۍ جشن وکړُو.“

يشعياه ۲۵:۹

خو کۀ چرې مونږ د هغه څيز اُميد کوُو څۀ چې مونږ نۀ وينو نو مونږ به په صبر سره د دې انتظار وکړُو.

روميان ۸:۲۵