ورځنۍ رڼا, مارچ ۲: نو هغۀ په خپل دوېم زوئ اِفرائيم نوم کېښودو

خُدائ پاک زما د تکليف په مُلک کښې ما له بچى راکړى دى. نو هغۀ په خپل دوېم زوئ اِفرائيم نوم کېښودو.

پېدايښت ۴۱:۵۲

زمونږ د مالِک عيسىٰ مسيح د خُدائ پاک او پلار ثنا دې وى چې د رحم نه ډک پلار او د هر قِسمه تسلۍ خُدائ پاک دے. هغه زمونږ په ټولو مصيبتونو کښې مونږ ته تسلى راکوى د دې دپاره چې مونږ نورو ته هم تسلى ورکولے شُو کله چې هغوئ په مصيبت کښې راګېر شوى وى نو مونږ هم هغه تسلى ورکولے شُو چې خُدائ پاک مونږ ته راکړې ده. د مسيح په وجه چې د څومره ډېرو تکليفونو سره مخامخ کيږُو نو ورسره خُدائ پاک په مسيح کښې زمونږ تسلى هم زياتوى.

دوېم کورنتيان ۱:۳–۵

اګر چې اوس تاسو د لږ وخت دپاره مختلف تکليفونه وزغمل. او دا آزمېښتونه به دا خبره ثابته کړى چې ستاسو ايمان اصلى دے، او دا وآزمائيلے شو لکه څنګه چې سرۀ زر په اور آزمائيلے کيږى، خو ستاسو ايمان د فانى سرو زرو نه ډېر زيات قيمتى دے. نو ستاسو ايمان به د عيسىٰ مسيح د راښکاره کېدو په ورځ د جلال او احترام سبب شى.

اول پطروس ۱:۶–۷

خو مالِک ما سره ودرېدو او هغۀ ما له طاقت راکړو.

دوېم تيموتيوس ۴:۱۷

نو بيا څوک چې په دې وجه د خُدائ پاک د مرضۍ په مطابق مصيبتونه زغمى، هغوئ دې خپل ځانونه وفادار خالق ته په حواله کړى او همېشه دې نېکى کوى.

اول پطروس ۴:۱۹

نو بيا د خُدائ پاک د خلقو دپاره د سبت ورځ د آرام ورځ تر اوسه انتظار کوى.

عبرانيان ۴:۹

چرته چې بدعمله خلق تکليف نۀ شى جوړولے، او ستړى خلق په آخر کښې آرام مومى. چرته چې قېديان هم په آرام وى، او هغوئ د ظالمانو آواز نۀ اورى.

ايُوب ۳:۱۷–۱۸

بختور دى هغه څوک چې د دې نه پس به په مالِک کښې مړۀ کيږى.“ او روحُ القُدس فرمائى چې، ”بې‌شکه بختور دى ځکه چې له دې نه پس به هغوئ د کړېدو نه په آرام وى، ولې چې د دوئ نيک عملونه به ورسره ملګرى وى.

رويا ۱۴:۱۳

زمونږ دوست لعزر اودۀ پروت دے خو زۀ ورځم چې راويښ يې کړم. عيسىٰ د هغۀ د مرګ خبره کوله خو د هغوئ خيال وو چې ګنې دے د فطرى اودۀ کېدو خبره کوى.

يوحنا ۱۱:۱۱, ۱۳

مونږ اوس هم په دې خېمه کښې يُو او د بوج لاندې زبيرګى کوُو.

دوېم کورنتيان ۵:۴

صرف کائنات نه بلکې مونږ هم په زبيرګو کښې يُو چې راته د روح اوله مېوه مِلاو شوې ده، او مونږ په دې اِنتظار کښې يُو چې خُدائ پاک مو په خپل زوئ والى کښې قبول کړى او زمونږ ټول وجود ته خلاصون ورکړى. نو چې مونږ خلاصون وموندو نو هغه اُميد راته مِلاو شو ... خو کۀ چرې مونږ د هغه څيز اُميد کوُو څۀ چې مونږ نۀ وينو نو مونږ به په صبر سره د دې انتظار وکړُو.

روميان ۸:۲۳–۲۵