ورځنۍ رڼا, نومبر ۲۴: زۀ به ستا د روح نه چرته لاړ شم؟

زما مور او زما وروڼه هغه څوک دى چې د خُدائ پاک کلام اورى او عمل پرې کوى.

لوقا ۸:۲۱

ځکه هغه څوک چې پاکوونکے دے او هغوئ څوک چې پاکيږى د ټولو پلار يو دے، نو په هم دې وجه عيسىٰ هغوئ ته په ورور او خور وئيلو نۀ شرميږى. نو هغه فرمائى چې، ”زۀ به خپلو خلقو ته ستا د نوم لوئى بيان کړم، ستا ثناء صِفت به زۀ د جماعت په مينځ کښې وکړم.“

عبرانيان ۲:۱۱–۱۲

ځکه کۀ زمونږ ايمان په عيسىٰ مسيح وى، نو بيا سنت او ناسنت څۀ غټه خبره نۀ ده. خو کوم کار چې ضرورى دے، هغه صرف ايمان دے چې ځان په مينې سره څرګندوى.

ګلتيان ۵:۶

تاسو به هله زما دوستان يئ چې زما په حُکمونو عمل کوئ.

يوحنا ۱۵:۱۴

بختور هغه دى څوک چې د خُدائ پاک کلام اورى او عمل پرې کوى.

لوقا ۱۱:۲۸

هر هغه څوک چې ما ته مالِک مالِک وائى هغه به د آسمان په بادشاهۍ کښې ورداخل نۀ شى، خو صرف هغه کس چې زما د آسمانى پلار په رضا کار کوى.

متى ۷:۲۱

زما خوراک څښاک دا دے چې زۀ د هغۀ رضا وکړم چا چې زۀ رالېږلے يم او چې د هغۀ کار پوره کړم.

يوحنا ۴:۳۴

کۀ مونږ دا وايو چې هغۀ سره شراکت ساتو او په تيارو کښې ګرځو نو مونږ دروغژن يُو او په هغې عمل نۀ کوُو څۀ چې رښتيا دى.

اول يوحنا ۱:۶

خو څوک چې د هغۀ په کلام عمل کوى نو په دغه کس کښې د خُدائ پاک مينه کامله شوې ده. نو مونږ بيا په دې پوهيږو چې په رښتيا په هغۀ کښې اوسيږو.

اول يوحنا ۲:۵

الياسه، تۀ دلته څۀ کوې؟

اول بادشاهان ۱۹:۹

خو هغۀ ته د هغې لارې پته ده چې کومه ما اختيار کړې ده.

ايُوب ۲۳:۱۰

اے مالِکه خُدايه، تا زۀ معلوم کړے يم او تۀ ما پېژنې. تا ته زما د ناستې پاستې پته ده، او زۀ کۀ لرې هم يم تۀ زما په سوچونو پوهېږې. زۀ کۀ ګرځم او کۀ ملاست يم، نو تا ته زما د ټولو کارونو پته ده. زۀ به ستا د روح نه چرته لاړ شم؟ ستا د حضور نه به چرته وتښتم؟ کۀ چرې زۀ د سبا په وزرو سور شم، کۀ چرې زۀ د سمندر په لرې غاړه اوسېږم، هلته به ستا لاس زما لارښودنه وکړى، او ستا قدرت به ما په تېزۍ سره راونيسى.

زبور ۱۳۹:۱–۳, ۷, ۹–۱۰

الياس زمونږ په شان انسان وو.

يعقوب ۵:۱۷

څوک چې د انسان نه يريږى هغه به په دام کښې ګېر شى، خو چې څوک په مالِک خُدائ توکل کوى هغوئ به په امن و امان شى.

متلونه ۲۹:۲۵

کۀ تيندک وخورى نو وبه نۀ غورزيږى، ځکه چې مالِک خُدائ يې په خپلو لاسونو کښې اوچتوى.

زبور ۳۷:۲۴

کۀ څۀ هم چې صادق انسان اووۀ ځله راپرېوځى هغه دوباره راپاڅى.

متلونه ۲۴:۱۶

نو مونږ دې په ښۀ کار کولو کښې همت نۀ بائيلو، ځکه کۀ مونږ همت ونۀ بائيلو نو مونږ به په خپل صحيح وخت فصل وريبو.

ګلتيان ۶:۹

ځکه چې روح خو تيار دے خو بدن کمزورے دے.“

متى ۲۶:۴۱

څومره چې پلار په خپلو بچو باندې مهربان وى، نو دومره مالِک خُدائ په هغوئ مهربانه دے څوک چې د هغۀ نه يريږى.

زبور ۱۰۳:۱۳