ورځنۍ رڼا, اګست ۲۷: زۀ د دُنيا نُور يم (يوحنا ۸:۱۲)

ستا کلام زما د پښو دپاره ډيوه ده او زما د لارې دپاره رڼا ده.

زبور ۱۱۹:۱۰۵

ما منلى دى ټول ستا حُکمونه کوم چې ما ساتى د ظالمانو د لارو. زۀ همېشه ستا په لاره يم روان، زۀ ستا نه نۀ يم اوړېدلے، يم دې پېروکار.

زبور ۱۷:۴–۵

هرکله چې تۀ روان يې نو هغه به ستا رهنمائى کوى، او کله چې اودۀ يې نو هغه به ستا حفاظت کوى، هرکله چې راويښ شې، نو هغه به درته مشوره درکوى. نو د هغوئ حُکمونه ډيوه ده او د هغوئ هدايت رڼا ده.

متلونه ۶:۲۲–۲۳

کۀ تاسو د لارې نه ښى يا ګس طرف ته واوړئ، نو د وروستو نه به ستاسو لار ښودنه کيږى چې، ”دا لاره صحيح ده، په دې روان شئ.“ تاسو به په خپلو غوږونو دا اورئ.

يشعياه ۳۰:۲۱

زۀ د دُنيا نُور يم. څوک چې ما پسې راځى هغه به هيڅکله په تيارۀ کښې نۀ ګرځى بلکې هغه به د ژوندون رڼا ومومى.

يوحنا ۸:۱۲

نو مونږ سره د نبوت هغه کلام دے چې ډېر معتبر دے، دا به تاسو ښۀ وکړئ چې په دې داسې غور وکړئ لکه چې ډيوه په يو تيارۀ ځائ کښې رڼا ورکوى.

دوېم پطروس ۱:۱۹

ځکه اوس مونږ ته دا په شيشه کښې تت ښکارى خو بيا به يې مخامخ ووينو. اوس زما عِلم نامکمل دے خو بيا به يې پوره وپېژنم څنګه چې زۀ پوره پېژندلے شوے يم.

اول کورنتيان ۱۳:۱۲

هلته به شپه نۀ وى او نۀ به هغوئ ته د ډيوې يا د نمر د رڼا ضرورت وى ځکه چې مالِک خُدائ پاک به د هغوئ رڼا وى، او هغوئ به هلته تل تر تله بادشاهى کوى.

رويا ۲۲:۵

تۀ څنګه اودۀ يې؟ پاڅه او خپل خُدائ ته سوال وکړه.

يُونس ۱:۶

ځکه چې دا ستا د آرام ځائ نۀ دے، ځکه چې دا پليت دے، دا تباه شوے دے.

ميکاه ۲:۱۰

د آسمانى څيزونو په حقله سوچ کوئ او د دُنياوى څيزونو په حقله سوچ مۀ کوئ.

کولوسيان ۳:۲

ولې چې ځان ورپورې ونۀ تړئ، هر څومره چې دولت ستا زياتيږى.

زبور ۶۲:۱۰

نو اوس د زړۀ د اخلاصه د مالِک خُدائ د خپل خُدائ پاک لټون وکړئ.

اول تواريخ ۲۲:۱۹

دا تاسو ولې اودۀ يئ؟ پاڅئ او دُعا وکړئ چې د آزمېښت په وخت ناکامه نۀ شئ.

لوقا ۲۲:۴۶

خيال ساتئ او پام کوئ. خپل زړونه په بد مستۍ، نشو او په دُنياوى غمونو مۀ آخته کوئ، ځکه چې هغه ورځ ناګهانه تاسو لکه د لټ راګېر نۀ کړى.

لوقا ۲۱:۳۴

کله چې د وادۀ زلمے په راتلو کښې ايسار شو نو هغوئ ټولو له خوب ورغلو او اودې شوې.

متى ۲۵:۵

اوس ډېر لږ وخت دے چې څوک چې راتلونکے دے هغه به راشى او ايسار به نۀ شى.

عبرانيان ۱۰:۳۷

تاسو ته ښۀ پته ده چې وخت کم دے، د خوبه رابېدار شئ. ځکه چې زمونږ خلاصون رانزدې شوے دے د کوم وخت نه چې مو ايمان راوړے دے.

روميان ۱۳:۱۱

نو بيا تاسو بېدار اوسئ ځکه چې تاسو په دې نۀ يئ خبر چې د کور مالِک به کله راځى، ماښام کۀ په نيمه شپه، په چرګ بانګ کۀ سحر په خړه. کۀ چرې هغه ناګهانه راشى نو چې هغه مو اودۀ لاندې نۀ کړى.

مرقوس ۱۳:۳۵–۳۶