ورځنۍ رڼا, سېپتمبر ۱۳: کۀ څوک تږے وى هغه دې ما له راشى

کۀ څوک تږے وى هغه دې ما له راشى، هغه دې وڅښى.

يوحنا ۷:۳۷

روح مې ليواله دے تر دې چې ناتوانه دے، د دې دپاره چې زۀ د مالِک خُدائ دربار ته ننوځم. زما زړۀ او زما ځان په چغه د ژوندى خُدائ ثناء صِفت کوى.

زبور ۸۴:۲

اے خُدايه، تۀ زما خُدائ پاک يې. د زړۀ نه ستا په لټون کښې يم، روح او زما ځان ستا تږے دے، لکه اوبۀ چې نۀ وى په زمکه خشکه او شاړه. تۀ ما په خپل مقدس مقام کښې ليدلے يې، او ستا جلال او زور هم ما ليدلے دے.

زبور ۶۳:۱–۲

مالِک خُدائ فرمائى، ”هر څوک چې تږى وى، راشئ اوبۀ وڅښئ. څوک چې مال دولت نۀ لرى، نو راشئ، واخلئ او وې خورئ. راشئ، مے او پئ واخلئ، دا مفت دى.

يشعياه ۵۵:۱

روحُ القُدس او ناوې وائى چې، ”راشه.“ او هر اورېدونکے دې هم وائى چې، ”راشه.“ او څوک چې تږے وى، هغه دې راشى، او څوک چې يې غواړى، د ژوندون د اوبو نه دې وړيا واخلى.

رويا ۲۲:۱۷

خو چې څوک هغه اوبۀ وڅښى چې زۀ يې ورکوم هغه به هيڅکله نۀ تږے کيږى. زۀ چې کومې اوبۀ ورکوم هغه به په هغوئ کښې دننه لکه يوه چينه وګرځى چې همېشه به بهيږى او چې د تل ژوندون ورکوى.“

يوحنا ۴:۱۴

زما بدن حقيقى خوراک دے او زما وينه حقيقى څښاک دے.

يوحنا ۶:۵۵

اے عاشقانو، وخورئ او وڅښئينه. او د مينې نه مست شئينه.

غزلې ۵:۱

تاسو د دُنيا دپاره مالګه يئ.

متى ۵:۱۳

بلکې ستاسو غېر فانى ډول سنګار دې په هغه باطنى انسانيت کښې په حليمۍ او په سکون کښې وى چې د خُدائ پاک په نزد ډېر قيمتى دے.

اول پطروس ۳:۴

ځکه چې ستاسو دوباره پېدا کېدل د فانى کېدونکى تخم نه نه بلکې د نۀ فانى کېدونکى تخم نه د خُدائ پاک د ژوندى او قائم کلام په وسيله بيا پېدا شوئ يئ.

اول پطروس ۱:۲۳

څوک چې په ما ايمان ساتى کۀ هغه مړ هم شى نو هغه به ژوندے وى.

يوحنا ۱۱:۲۵

ځکه چې هغوئ د مرګ نه پس بيا راژوندى شوى دى نو ځکه د خُدائ پاک بچى ګڼلے کيږى.

لوقا ۲۰:۳۶

او هغوئ د ابدى او لوئ خُدائ پاک په ځائ د فانى انسان.

روميان ۱:۲۳

او په چا کښې چې د مسيح روح نۀ وى نو هغه د مسيح نۀ دے. خو کۀ چرې مسيح په تاسو کښې اوسى نو کۀ څۀ هم ستاسو وجود د ګناه په وجه مړ شى، خو روح تاسو ته ژوند درکوى ځکه چې روح تاسو د خُدائ پاک سره رضا کړئ. کۀ چرې د خُدائ پاک روح په تاسو کښې وى چا چې عيسىٰ د مړو نه بيا ژوندے کړے دے، نو چا چې مسيح د مړو نه بيا ژوندے کړے دے هغه به ستاسو فانى وجودونو ته هم نوے ژوند ورکړى، د خپل هغه روح په وسيله چې په تاسو کښې اوسى.

روميان ۸:۹–۱۱

د فنا په حالت کښې ښخ کړے شى او په غېر فانى حالت کښې راژوندى کيږى.

اول کورنتيان ۱۵:۴۲

په خپلو کښې مالګه وساتئ او د يو بل سره په صُلح اوسئ.“

مرقوس ۹:۵۰

خرابه او پوچه خولۀ مۀ استعمالوئ. کومه خبره چې کوئ چې هغه نېکه او چې د نورو دپاره مدد کوونکى وى، نو څوک چې ستاسو خبرې واورى چې د هغوئ د جوړولو دپاره د ډاډ او برکت باعث وى.

اِفِسيانو ۴:۲۹